آيان العقارية

شركة أيان العقارية، شركة تطوير عقاري في جدة عمرها أكثر من 16 سنة، متخصصة بتطوير أراضي سكنية وتحويلها لفلل وشقق تمليك بمعايير بناء عالية وتشطيبات فاخرة. عنده مشاريع متعددة بمناطق مميزة بجدة، من ضمنها مشروعي الروضة 119 والروضة 120. المشروع كان جاهز والمنتج قوي، بس التحدي كان كيف نوصل هالمشروع لجمهور جاد وجاهز يشتري، وكيف نحوّل الاهتمام لطلبات تواصل فعلية.

لما قعدنا مع أيان العقارية، شفنا إن عندهم مشاريع بمواقع استراتيجية وجودة بناء عالية، بس الحضور الرقمي ما كان مستغل بالشكل الصح. الموقع الإلكتروني القديم ما كان يعكس مستوى المشاريع ولا يسهّل على المهتم يوصل لمعلومة أو يترك بياناته، والحملات الإعلانية ما كانت مربوطة بأي نظام واضح يحوّل الزيارة لطلب تواصل حقيقي. حسّينا إن في فرصة نبني منظومة رقمية متكاملة من الصفر: موقع جديد، محتوى إعلاني قوي على ميتا، وربط كل شي ببعضه بشكل مدروس.

قبل ما نبدأ أي تنفيذ، درسنا رحلة المهتم بالعقار من أول ما يشوف الإعلان لحد ما يتواصل:

الموقع القديم ما كان مبني بشكل يعكس فخامة المشاريع ولا يسهّل التصفح بين المشاريع المختلفة.

ما في صفحات هبوط مخصصة لكل مشروع، فالمهتم بمشروع معين كان يوصل لصفحة عامة ما تجاوب على أسئلته المباشرة.

الموقع ما كان محسّن لمحركات البحث، فكان في فرصة ضايعة من الزوار اللي يبحثوا عن عقار بجدة بشكل مباشر.

الحملات الإعلانية القديمة بعضها بدون تحسين مستمر، وما كانت مربوطة بمسار واضح من الإعلان للموقع أو نموذج التواصل.

اشتغلنا على منظومة إعلانية متكاملة لمشاريع الشركة السكنية، مبنية على اختبار مستمر وتحسين حسب الأداء:

تنويع المحتوى الإعلاني أنتجنا أكتر من صيغة إعلان لكل مشروع: صور، فيديوهات بنصوص، فيديوهات بدون نصوص، وصور توضيحية لواجهات المشاريع، عشان نختبر أنسب صيغة توصل للجمهور وتحوّله لطلب تواصل.

نماذج توليد العملاء المحتملين (Lead Forms) ربطنا الحملات بنماذج ليد مباشرة داخل ميتا، عشان نقصر رحلة المستخدم ونسهّل عليه يترك بياناته بأقل خطوات ممكنة، بدل ما نعتمد بس على تحويله للموقع.

التحسين المستمر حسب الأداء راقبنا كل إعلان على حدة من ناحية تكلفة الليد والوصول والانطباعات، وأوقفنا الإعلانات الضعيفة وركزنا الميزانية على الصيغ اللي كانت تجيب ليدات بتكلفة أقل وجودة أعلى، زي إعلانات الفيديو بنصوص توضيحية اللي كانت من أقوى الصيغ أداءً.

الاستمرارية والتوسع بين المشاريع ما اشتغلنا على مشروع لحاله، خلينا الحملات شغالة بالتوازي بين مشاريع الشركة، عشان نغطي قاعدة أوسع من الجمهور المهتم بنفس المنطقة ونوزع الفرص بينهم.

من خلال حملات مشاريع الشركة السكنية على ميتا، حققنا أكثر من 12.6 مليون انطباع ووصلنا لأكثر من 4.2 مليون حساب فعلي، بإجمالي إنفاق إعلاني حوالي 51,455 ريال سعودي على أكثر من 86 إعلان مختلف. الإعلانات اللي اعتمدت على الفيديو بنصوص توضيحية كانت من أقوى الصيغ من ناحية عدد الليدات وتكلفة العميل المحتمل، وهاد أكد لنا صحة استراتيجية تنويع المحتوى والتحسين المستمر بدل الاعتماد على صيغة واحدة.